Programación de actividades. Marzo 2013

Xa tedes á vosa disposición no menú "Programación" (no lado dereito da pantalla) todas as actividades que ao longo do mes de marzo se van celebrar na Biblioteca Xosé Neira Vilas, que cumpre xa dous anos de vida!

Para celebrar este aniversario presentámosvos un completo programa, no que poderedes atopar as nosas actividades permanentes, tanto as dirixidas aos máis pequenos, como o Sabadiño do Roque, a Hora dos Contos ou Entre Arrolos e contiños; como as dirixidas ao público adulto, como os Contos Dakí, que este mes conta con Avelino González como mestre de cerimonias.

Pero ademáis, convidámosvos a participar nun novo Obradoiro de escritura, a cargo de Francisco Castro, ou no tan demandado Achégate á internet: Procura de emprego, que ven da man da mostra bibliográfica deste mes: Bibliolabora, onde poderedes atopar un sinfín de recursos relacionados coa busca de emprego, a elaboración de currículos, as melloras no traballo, a xestión dos recursos humanos ou o autoemprego.

Os cativos, neste mes tan especial, contarán tamén cunha divertida obra de monicreques a cargo da compañía Tanxarina, que nos presenta o espectáculo Timoteo, o amigo do labrego.

Non queremos pasar a ocasión de convidarvos a participar na nosa próxima cita: o vindeiro martes 5 ás 19.30h, visítanos de novo, dous anos despois da apertura da biblioteca, Cándido Pazó, cunha magnífica sesión de contacontos para adultos titulada Contos da memoria dun neno labrego.

Agardámosvos!

Programa de actividades. Marzo 2013

Programas escolares. Encontro con Miguel Ángel Alonso Diz

Na mañá de onte, os alumnos de 1º de primaria do CPR Martín Códax, que visitaron a biblioteca dentro dos nosos Programas escolares, tiveron a sorte de ter un encontro con Miguel Ángel Alonso Diz, autor d' O cullarapo Croque. 

Tras coñecer o funcionamento da biblioteca, Miguel Ángel presentoulles o seu libro, protagonizado por un simpático cullarapo que serve de fío condutor entre os poemas que viven neste libro, con páxinas cheas de poesía, de fermosas ilustracións e sobre todo de moita dozura.

Así, da man do autor, escoitamos algunhas das historias agochadas no libro, bailamos tamén ao son das cancións que nos presentou o cullarapo e para rematar, despois desta fantástica experiencia, todos os participantes puideron debuxar o seu personaxe favorito!

Miguel Ángel vai voltar á biblioteca o vindeiro mércores 27 ás 18.00h, nunha sesión aberta a todo o público, grazas á colaboración do Servizo de Normalización Lingüística do Concello de Vigo. Recomendámosvos non faltar á cita!

Entre arrolos e contiños. Febreiro 2013

O pasado sábado Bea Campos e David González deleitaron aos máis pequenos da bibliteca cunha nova sesión de Entre arrolos e contiños.

Tivemos a ocasión de asistir ao estreo duhna nova canción que dende agora nos vai servir para dar a benvida e despedir a xornada, o pegadizo Arrorró que dende o sábado non deixamos de cantarruxar.

Non podían faltar fermosos e divertidos contos como o da Granxa de Manuel, co que poidemos coñecer distintos animais. Tamén nos acompañaron os tres Chibos Chibóns, todo un clásico xa da literatura infantil, ou as peripecias do crocodilo que saía de paseo. Como sempre, todo acompañado polas fermosas melodías do saxo e o acordeón de David.

Tampouco faltou tempo para o xogo entre pais e fillos, que xunto cos contos axudan a estreitar os vínculos afectivos entre ambos e ensínannos como desfrutar do tempo de lecer que pasamos cos nosos cativos.

Entre arrolos e contiños

Próxima sesión: sábado 16 de marzo ás 12.00h
 

Contos Dakí. Paula Carballeira

O venres Paula Carballeira visitou novamente a Biblioteca Neira Vilas para deleitarnos coas súas historias nunha nova cita cos nosos Contos Dakí.

Contos traídos de moi distintos lugares do mundo, de Irlanda a Xapón, pasando por Galicia ou Armenia. Ceñecemos así ao falador Patrick O'Connor, á fermosa pero triste princesa Maimara, ao pescador que atopou cun xenio nunha botella, ao labrego que foi buscar a Deus ou ao inglés que visitou a Terra dos Demos. 

Historias moitas elas de medo, das que poñen a pel de galiña, tamén cargadas de humor, pero tamén, como non podía ser doutra forma, de mensaxes que nos convidan a reflexionar. 

Paula regresará á biblioteca no mes de maio, pero recomendámosvos non perder a vindeira sesión de Contos Dakí, con Avelino González.

Contos Dakí

Próxima sesión: 22 de marzo ás 19.30h

Conta: Avelino González

O alcalde de Vigo visita a Biblioteca Neira Vilas

Na mañá de onte o alcalde de Vigo, Abel Caballero, acompañado pola tenente de alcalde Carmela Silva, o concelleiro de fomento David Regades e o concelleiro de cultura Cayetano Rodríguez, visitaron a biblioteca, que o próximo mes de marzo cumple xa dous anos de andadura.

Despois de percorrer as instalacións, Abel Caballero destacou o bo funcionamento da BPM Xosé Neira Vilas, que definiu como a "crónica dun éxito anunciado", e é que dende que abriu as súas portas en 2011 recibiu a máis de 121.000 usuarios que acudiron ao centro a facer uso dos distintos servizos que ofrecemos: lectura en sala, préstamo de documentos, servizos de internet e ofimática, servizo de audición e visionado, etc. 

Ao remate de 2012 os socios duplicáronse con respecto a 2011, chegando aos 6.895, e os préstamos superaron os 66.400 exemplares, o que supón un nivel de rotación de catro, é dicir, que cada documento se presta de media catro veces, o que indica, en palabras do alcalde, "un nivel moi importante de interese pola riqueza bilibliográfica do centro".

Así mesmo, o alcalde suliñou a importancia do programa de actividades que levamos a cabo na biblioteca, con numerosas iniciativas que van dende a animación á lectura para os máis cativos (incluídos os bebés), aos contacontos para adultos, os programas para escolares, ou as accións de formación de usuarios, tanto de alfabetización dixital como de procura de emprego, entre oturas. En total, 235 actividades nas que participaron máis de 13.000 persoas.

Podedes consultar máis información sobre a visita nos seguintes enlaces:

Atlántico Diario

Xornal Vigo

Tamén podedes ver a programación do trimestre pinchando aquí: Programa de actividades xaneiro marzo 2013

Non nos queda máis que darvos as grazas a todos vós, aos nosos usuarios, sen os que este éxito non sería posible. Vémonos na biblioteca!

 

A hora dos contos. Febreiro 2013

Na cita de febreiro coa nosa Hora dos Contos, que coincidiu co 14 de febreiro, o protagonista non podía ser outro que o Amor.

Así, achegámonos á verdadeira historia de San Valentín, ocorrida no tempo dos romanos, e que simboliza o amor e a amizade duradeira, así que este día non se adica só aos namorados, senón a todas as persoas que queremos, como son os amigos verdadeiros.

A través das distintas historias de Trini fomos coñecendo historias de amor moi distintas, como a do hipopótamo Owen, que despois de paerder á súa familia atopou finalmente á tartaruga Zee, que se converteu na súa nova familia. Contamos e cantamos tamén o amor entre Xirafa e Crocodilo, o de Ratona e Elefante ou o da princesa de lume, que soubo grazas a unha pedra que o amor non consiste en pedir e recibir senón que hai que traballalo día a día...

Como sempre, para rematar a sesión, os nenos fixeron debuxos relacionados coas historias do día para completar o Diario da Hora dos Contos.

A hora dos contos

Próxima sesión: xoves 14 de marzo ás 18.00h

+ Misterio. Mostra bibliográfica

En + Misterio propoñémosvos unha escolma de novelas, cómics e películas da man dos grandes xenios do xénero. Crimes, policías, intrigas, espías, conspiracións... personaxes e argumentos que conseguen manternos en tensión, cos pulsos acelerados e completamente “enganchados” ata a resolución da trama, son compañeiros inseparables para pasar un mes de febreiro cargado de suspense.

Así, a biblioteca exporá unha selección do seu fondo bibliográfico onde atoparemos dende as historias de Holmes ata do noso inspector vigués máis coñecido, Leo Caldas, pasando polas páxinas envelenadas de Umberto Eco.

+ Misterio

Do 4 de febreiro ao 2 de marzo de 2013 en horario de apertura da biblioteca

O sabadiño do Roque. De viaxe por Galicia: Verín

Como cada mes, comezamos febreiro cunha nova cita co Sabadiño do Roque, que veu acompañado, como non, de Andrea e Óscar para facernos máis divertida a mañá do sábado.

Tras coñecer a historia de Andrés, que foi comido por un ogro, que á súa vez foi engulido por un dragón, e á súa vez por un oso e por un lobo, e como conseguiu saír de tal apuro, Andrea púxose na pel da Ratiña Fachendosa e foi coñecendo aos seus namorados: o cabalo, o can, o gato e o ratiño, todos eles excepcionalmente interpretados polos participantes na actividade!

Chegou a hora de chamar por Roque, e desta vez sorprendeunos a todos aparecendo disfrazado de Súper Roquiño, preparado para celebrar o Entroido por todo o grande. E como non podía ser doutra forma nestas datas, na carta que recibiu do avó Agustín este dicíalle que andaba de festa por Verín, rodeado polos seus famosos cigarróns.

Finalmente, para ir quentando motores de cara á próxima semana, cada neno preparou o seu propio antiface, e con eles postos despedimos a sesión, non sen antes cantarlles os parabéns a todos aqueles que durante o último mes estiveran de aniversario.

As fotos desta festa "pre-entroideira" están como sempre dispoñibles no Álbum da biblioteca

O sabadiño do Roque

Próxima sesión: sábado 2 de marzo ás 12.00h

*Inscrición a partir do 15 de febreiro