lunes, 30 de diciembre de 2013

A cesta dos libros

Agora que remtata o 2013, o terceiro ano da Biblioteca Xosé Neira Vilas queremos agradecervos unha vez máis a todos os usuarios a vosa participación, os vosos comentarios de apoio, os bos momentos compartidos... Desexando compartir moitos máis!

É por iso que tamén neste ano queremos premiar ao público lector máis activo de cada categoría (adulto e infantil) cun lote de libros para comezar o 2014 coas mellores lecturas.


Estes son as mellores lectoras de 2013 na categoría de Adulto:

    Covadonga Lareu Rodríguez
    María del Carmen Roma Vázquez
    Alba González Correa
 

E agora os mellores lectores de 2013 na categoría Infantil:

    Breixo Merino Gómez
    Valentina Longueira Pizzuto
    Iria Comesaña Villar




Dende a Biblioteca Xosé Neira Vilas

 desexámosvos 2014 boas lecturas!

sábado, 28 de diciembre de 2013

Contos Dakí: Avelino González

 
Unha vez máis tivemos a sorte de ter a Avelino González na biblioteca para que realizase unha contada nos nosos CONTOS DAKÍ.


Nesta ocasión Avelino contounos moreas de historias e anécdotas da vida do mar. Pero non de calquera, se non "Historias do Mar de Vigo", ao igual que o famoso plan quixo "abrir Vigo ao mar".

Un mar que é camiño, ás veces de vivos e ás veces de mortos e así ás veces as historias son cómicas pero ás veces son tristes. Porque o mar non se leva na sangue... se leva nos petos, porque é preciso saír ao mar para traballar e gañar o pan.

Como a historia de Serafín Mourelle, que ten como alcume o "Supervivente" porque saíu vivo de varios naufraxios. Ou as historias dos mariñeiros do Gran Sol e as súas técnicas e aparellos, e sobre todo do seu idiolecto o máis que famoso "GHALEINGHLIS".

Do Ghaleinghlis saíron grandes vocablos como "alucar" (look at) = mirar "Alucaches os peixes"; Likear (Like)= gustar, Safar (save)= búscate a vida, a todo filispin (full speed)= ir rápido e o brus que xa non precisa tradución.


Avelino fíxonos pasar un rato moi divertido con todas estas anécdotas ao tempo que fixo unha gran homenaxe a todos estes homes que se xogan a vida para poder traer peixe ás nosas mesas para o Nadal.


Contos Dakí
Próxima sesión: venres 31 de xaneiro ás 19.30h
Conta: Celso Sanmartín

Obradoiro de Nadal

Continuando coas actividades de Nadal para o público infantil fixemos na biblioteca un obradoiro para decorar a nosa árbore.

Antes de comezar o obradoiro visionamos a fermosísima curta "The Snowman", baseada no álbum de Raymond Briggs. Nela cóntase a historia dun neno que realiza un moneco de neve e ao chegar as doce da noite o moneco toma vida. Entre os dous nace unha fermosa amistade; o neno móstralle ao moneco de neve a súa casa e xogan cunha moto adentrándose no bosque onde se atopan con diferentes animais, de regreso á casa  o moneco de neve quere amosarlle ao neno o seu mundo así que saen voando ao tempo que se escoita a magnifica canción "Walking in the Air". Chegan á casa do moneco de neve que é nin máis nin menos a casa de Papá Noel. Cando chega o día o neno desperta na súa cama pero aínda conserva o agasallo que lle fixo Papá Noel, unha bufanda de monecos de neve.

A continuación fixemos uns homiños de mazapán para decorar a árbore, pero estes homiños eran moi especiais e non se poden comer porque son de decoración. 







E como sorpresa final veu o Carteiro Real que atendeu todas as peticións para as nosas maxestades os Reis Magos.

Contos de Nadal



Como cada Nadal a biblioteca Neira Vilas organiza diferentes actividades para que o público infantil goce da biblioteca nas súas vacacións. Nesta ocasión Bea e David acompañáronos unha vez máis, esta vez deixaron os seus Arrolos na maleta-xoaniña e fixeron unha sesión de contos para un público moito máis maior... de tres anos para diante.


Acompañamos a Bea e David "neste fantástico día" a cazar un oso. Sen ningún medo pasamos por un campo, un río, unha lameira, un bosque e unha tormenta ata chegar á cova do oso... Que medo! Nunca máis imos cazar un oso tan grande e fabuloso... se non nos acompañan, claro, Bea e máis David.
Logo Bea contounos o conto "De cando a Martiño lle entraron ganas de facer pis na noite de Reis" e gozamos todos co Chucuchu do tren de Martiño.

Para rematar a contada nada mellor que a historia do "Homiño de Mazapán" del aprendemos que das avoas e dos avós non podes rir, porque se non da raposa non podes fuxir.

Despois continuamos cun obradoiro moi especial no que fixemos unhas preciosas estrelas de Nadal que quedaron moi fermosas, claro está coa imprescindible purpurina que mellora todo.





jueves, 26 de diciembre de 2013

Rodari Rodari. Contos do Tranvía

O pasado 23 de decembro, nas vísperas das festas de Nadal, tivemos o pracer de contar na biblioteca co espectáculo Rodari Rodari. Contos do Tranvía, grazas ao Servizo de Normalización Lingüística do Concello de Vigo.

Partindo do Tranvía de Marín como fío condutor, coñecimos aos distintos personaxes que traballaron ou viaxaron no mentado tranvía, como Moncho, Ramón o carboeiro (ou o chucurruchú), o revisor ou Guillermo o médico. Da man de todos eles fómonos adentrando en fantásticas e divertidas historias, tanto da tradición oral como do mestre do conto Gianni Rodari, e así soubemos do burro que non sabía que era un burro ou da estraña enfermidade da maturrangaina... Todo acompañado por suposto por pegadizas melodías e cancións populares.

Para rematar, despedímonos de Inacio montando no seu tranvía, que agardamos non tarde en voltar pola biblioteca!

Podedes gozar coas imaxes da sesión pinchando no Álbum da biblioteca.

lunes, 23 de diciembre de 2013

Entre arrolos e contiños. Decembro 2013

O sábado 21, para estrear as vacacións de Nadal, celebramos na biblioteca nova sesión de Entre arrolos e contiños, na que os máis cativos puideron gozar das fantásticas historias e cancións de Bea Campos e David González.

Así, seguimos as pegadas de distintos animais do zoo que nos ían saúdando ó noso paso... e paseando tamén atopamos un Becho estraño... qué será??

Despois, e estando tan próximas as festas, tocoulle o turno ao Homiño de Mazapán, que escapando dos avós acabou no bandullo dunha astuta raposa. Pero este mazapán foi só o aperitivo, xa que despois acompañamos a Bea e David ao mercado a comprar café, champú, azafrán, lentellas e regaliz... pero unha formiguiña rabuda non deixaba de picarnos a pesar do que nós rebulíamos... Todo acompañado como sempre polas fermosas melodías do acordeón de David.

Podedes ver as fotos da xornada, como de costume, no álbum da biblioteca.


Entre arrolos e contiños
Próxima sesión: 18 de xaneiro de 2014
Inscrición a partir do día 2 de xaneiro ás 10.30h


viernes, 20 de diciembre de 2013

Felices Festas!


Dende a Biblioteca Xosé Neira Vilas
 desexámoslles 2014 boas lecturas!

miércoles, 18 de diciembre de 2013

Encontros con escritores


Ao longo do mes de decembro, e grazas á colaboración coa Asociación Galega do Libro Infantil e Xuvenil Gálix, tivemos o pracer de celebrar na biblioteca tres encontros con algúns dos escritores máis importantes  no eido da literatura infantil do panorama actual. Estes encontros organizáronse dentro dos Programas para escolares da biblioteca, e contaron coa participación do alumnado dos centros de ensino que tiñan concertada as súas visitas á biblioteca.


Así, os alumnos do CEIP Pombal puideron gozar da visita de An Alfaya, que nos contou interesantísimas anécdotas do seu oficio de escritora, que a leva a escribir todo tipo de historias que aniñan na súa cabeza, dende contos a poemas, pasando polo teatro, etc. A inspiración para crear cada unha delas é do máis dispar, incluído o seu pequeno de 4 anos que foi o primeiro en falarlle dunha árbore que acabaría por dar título ao libro O aroma do liquidámbar.



Tamén pasou pola biblioteca Pere Tobaruela, que foi quen de crear unha pequena historia cos alumnos do Colexio Labor a partir das 7 preguntas de Gianni Rodari para crear un conto: Quen era? Onde estaba? Que facía? Que dixo? A quen llo dixo? Que lle contestaron? Como rematou todo?. Escollendo as respostas a cada unha destas preguntas os participantes convertéronse por un momento en escritores de novela negra e crearon unha truculenta historia de intriga e misterio, con cemiterios e zombies incluídos!



O último en visitarnos foi Marcos Calveiro, que confesou ao alumnado do CEIP Lope de Vega que para el escribir era un verdadeiro acto de amor, que ademais lle permite ser todo aquilo que quixo ser de neno. E é que a inspiración de moitas das súas obras remíteo de feito á súa infancia, chea de pelis do oeste, cancións, debuxos animados, tebeos... e moitos moitos libros! Porque para ser un bo escritor, é condición indispensable ser tamén un grande devorador de libros...





A todos eles queremos agradecer a súa presencia na biblioteca; de todos eles aprendimos un pouquiño máis o significado de ser escritor.



Tedes todas as fotos dos encontros no Álbum da biblioteca. Así mesmo, podedes consultar os libros que de cada un temos na biblioteca nos seguintes enlaces:
 





lunes, 16 de diciembre de 2013

O sabadiño do Roque. Decembro 2013

O sábado 14 de decembro, Roque, Andrea e Óscar voltaron despois de moitas semanas á biblioteca para compartir un mes máis unha fantástica xornada de contos e xogos.



Para non perder o costume, presentámonos todos ao ritmo da canción de benvida, que nos valeu tamén para ir rompendo o xeo, xa que acto seguido Andrea precisou de varios voluntarios para poñer en escea a historia do desfile animal encabezado por un pequeno parruliño, que fuxindo do ritmo militar do vello parrulo Xilberto, creou unha nova forma de marchar camiño da charca onde todos os animais tomaban o baño...

Rematada a función apareceu o Roque, tremendamente abrigado porque acababa de chegar de Cabeza de Manzaneda. Despois de despoxarse de bufanda, gorro e gafas, leu con grande emoción a carta do avó Agustín, que unha vez máis retou a todos os participantes a resolver as sásu adiviñas.

E para poñer a guinda a esta xornada xa prenavideña, xogamos un par de rondas ao Lobo e cantamos a canción dos dedos... Sen esquecernos de felicitar a todos aqueles que estiveron de aniversario dende a última visita do Roque!


Tedes todas as fotos da xornada, como sempre, no  Álbum da biblioteca.


O sabadiño do Roque
Próxima sesión: sábado 4 de xaneiro ás 12.00h
*Aberto o prazo de inscrición

sábado, 14 de diciembre de 2013

A hora dos contos. Decembro 2013

O pasado xoves, como cada mes, poidemos gozar cunha nova sesión da Hora dos Contos. Desta volta, estando xa nestas datas, Trini  contounos varias historias relacionadas co frío e o inverno. Clásicos como o da Formiga e a Cigarra, con concerto a capella incluído, Riciños de ouro e os tres osiños ou a historia dos nenos que nun frío día de inverno constrúen un bonito boneco de neve, que pouco a pouco se vai derretendo...

Para rematar, e ir quentando motores, realizamos unha bonita postal de Nadal inspirada no personaxe deste último conto. Podedes comprobar os fantásticos resultados no Álbum da biblioteca

A hora dos contos
Próxima sesión: xoves 16 de xaneiro ás 18.00h

lunes, 9 de diciembre de 2013

Club de lectura

O pasado xoves 5 de decembro, as participantes no Club de lectura da biblioteca tiveron o pracer de contar coa presenza da escritora An Alfaya, autora de Areaquente, para poder compartir e debatir con ela as súas visións sobre a obra. Da mesma forma, tiveron a oportunidade de escoitar de primeira man as reflexións da propia autora sobre a novela. Foi un verdadeiro pracer a súa visita, e dende aquí amosámoslle o noso máis sincero agradecemento.

O club de lectura celébrase dúas veces ao mes (1º e 3º xoves) e reune a un grupo de persoas afeccionadas á lectura para comentar e valorar un libro proporcionado pola propia biblioteca coa axuda da coordinadora Marila Ruíz. O club está concibido para todas aquelas persoas con inquedanzas culturais, ganas de ler e de intercambiar ideas e opinións con outras persoa lectoras.

*Pechada a inscrición

jueves, 5 de diciembre de 2013

Do incunable ao ebook. Mostra bibliográfica

Para festexar que o vindeiro 17 de decembro se celebra o Día da Edición, dende a BPM Neira Vilas ofrecemos unha mostra bibliográfica ao redor deste sector, tan relacionado co mundo das bibliotecas e vital para a vida do libro, tanto en papel como en formato dixital. 

Así, amosarase unha selección de libros sobre o mundo editorial, as tipografías, a historia do libro, o deseño, a lecutra dixital...
Todos eles atoparédelos nunha zona destacada da biblioteca, e estarán a disposición das persoas usuarias tanto en consulta en sala así como para o servizo de préstamo.

Do incunable ao ebook. Mostra bibliográfica
Do 2 ao 30 de decembro de 2013
Horario de apertura da biblioteca

martes, 26 de noviembre de 2013

Entre arrolos e contiños. Novembro 2013




Unha vez máis, Bea Campos e David González fixeron as delicias de grandes e pequenos nuha nova xornada Entre arrolos e contiños.


Tras a canción de benvida, poidemos gozar con historias como a do Señor Croque e a súa excursión ou coas pillerías do Gato lambón, aprender como son e como viven os animais da selva, ou aproximarnos á música a través das fermosas melodías do saxofón e da melódica de David.

Por suposto non faltaron cancións tradicionais como a Saia da Carolina, o Tirorirorero ou Carmiña Carmela.

Para rematar, despedímonos ata a vindeira sesión, con moitas ganas de que chegue!!

Entre arrolos e contiños
Próxima sesión: sábado 21 de decembro de 2013 ás 12.00h
*Inscrición: a partir do 2 de decembro ás 10.30h.

Contos Dakí. Paula Carballeira

Paula Carballeira foi a encargada de deleitarnos o pasado venres cunha nova sesión dos Contos Dakí. Desta volta, estando a piques de comezar o inverno, e sendo xa as noites longas e frías (a pesar do cambio climático), os seus contos xiraron ao redor do tema da morte, que non necesariamente teñen que ser contos de medo.
Así, fomos coñecendo historias como as dos islandeses Tormut e Target, e a súa peculiar relación despois da morte, da peixeira Dona María, que unha vez finada non sabe se ten que ir para o ceo ou para o inferno, e tras intentar entrar no ceo e ser atendida por San Pedro, Santo Tomás, San Pablo ou o mesmo Deus, decide que alí non quere quedar. E falando de personaxes bíblicos coñecimos tamén a curiosa forma en que morreu Moisés, pero tamén historias máis mundanas como a do neno que quería morrer, ou o vello que cansado de vivir vai en busca da morte.

Todas elas xeniales e todas elas capaces de arrincar un sorriso, cando non unha gargallada, entre o numeroso público que tivo o pracer de escoitar estes contos nosos dakí e tamén dalí.

Contos Dakí
Próxima sesión: venres 27 de decembro ás 19.30h
Conta: Avelino González


lunes, 18 de noviembre de 2013

A hora dos contos. Novembro 2013

O pasado xoves gozamos unha vez máis cunha nova sesión da Hora dos Contos, na que Trini Puentes nos presentou tres fermosas historias que xiraron ao redor das persoas maiores. 

En primeiro lugar, soubemos das peripecias dunha avoa que, de camiño á voda da súa neta, atopa cun lobo, un oso e un león, todos eles con moita fame e ganas de darse un bo banquete... Será grazas á súa astucia e habilidade que conseguirá, coa axuda dunha cabaza, liberarse de tan terribles feras.

A continuación, coñecimos a fermosa historia de amor de Manuel e Manuela, que a pesar de ser moi maiores e estar xa moi engurrados, deciden aproveitar a vida ao máximo.

E por último, un conto no que dous velliños teñen o desexo de ser pais, así que proban de todo: un fillo de pau, de trapo, de pataca, de pan... ata que dan coa solución: o gatiño bebé bighotes.

De todos estes relatos aprendimos o divertidos que poden ser os nosos maiores, aos que hai que mirar sempre cos ollos do corazón.

Para rematar, trasformámonos todos en marchosos avós e avoas grazas a unhas fantásticas máscaras... Podedes comprobalo no Álbum da biblioteca!


A hora dos contos
Próxima sesión: xoves 12 de decembro ás 18.00h

viernes, 8 de noviembre de 2013

O bo se breve... Mostra bibliográfica



Relato, conto, microrrelato, microconto, minificción,  miniconto, conto minúsculo, conto en miniatura, contículo, relato breve... Son moitas as formas nas que nos podemos referir a ese xénero literario cuxa maior característica é a brevidade do seu contido. E é que xa o di o refrán, o bo se breve... Pero ademáis, en palabras de Julio Cortázar, o relato é capaz de escoller  unha imaxe, un acontecemento significativo, que actúa no lector como unha especie de apertura, de fermento cara a algo que vai máis alá. Recorta  un fragmento da realidade, con límites, pero de tal maneira que este recorte actúa como unha explosión que abre de par en par unha realidade moito máis ampla.

Fascinados como estamos por este xénero en absoluto menor, durante o mes de novembro a biblioteca ofrece unha mostra bibliográfica na que contaremos con grandes autores como o xa mencionado Cortázar, Poe, Quiroga, Roal Dalh ou Manuel Rivas, que teñen amosado as súas grandes dotes literarias nesta arte do relato breve.


O bo se breve...
Do 4 ao 30 de novembro
Horario de apertura da biblioteca

martes, 5 de noviembre de 2013

Visitas escolares


Un ano máis a biblioteca Xosé Neira Vila pon en marcha o seu programa de visitas escolares. 
Este ano a biblioteca Neira Vilas, co seu programa de actividades “Descubrindo as ciencias”, únese o proxecto das bibliotecas escolares LER CIENCIA NA BIBLIOTECA ESCOLAR. Con este proxecto queremos amosar aos escolares os servizos que ofrece a biblioteca, o funcionamento da mesma e por en valor o material relacionado coa ciencia ( os textos divulgativos, os textos literarios e o material audiovisual). 


Nestas visitas o público pode decubrir a biblioteca e o seu funcionamento. Ademais dunha visita guiada pola instalacións realízanse diferentes sesións de contacontos, xogos e obradoiros poñendo interese nos inventos e nos inventores. 
 Aquí podedes ver o noso ROSCO CIENTÍFICO, onde o alumnado ten que atopar os inventos e inventores que agóchanse no abecedario. 

Esta activiade está aberta a todos os centros de ensino da zona de influencia da biblioteca.

Para reservar unha visita á biblioteca podedes facelo a través do teléfono 
986 26 77 59  ou do enderezo electrónico  bpneiravilas@vigo.org

O Sabadiño do Roque. Novembro 2013


 
Unha vez máis acompañáronnos este sábado os nosos amigos Andrea, Óscar e o noso queridísimo Roque. Igual que noutras ocasións comezamos esta sesión de contacontos coa nosa canción de Bo día onde fomos presentándonos un a un.

Andrea logo contounos varios contos de medo, pero como o público da biblioteca e un público valentenon tivemos medo de nada e demostramos todos a nosa valentía e a nosa forza para superar os nosos medos. Logo apareceu Roque disfrazado, o moi pícaro quería asustarnos...pero non o conseguiu!

Explicounos que viña disfrazado para dar medo porque se celebrara o Samaín. Tamén explicounos a orixe desta festa e as tradicións que se realizan nesta festa como disfrazarse, decorar cabazas... Unha vez máis houbo carta do avó Agustín que enviou a Roque con varias adiviñas para que o público axudase a Roque a descifralas.

Nesta ocasión xunto con Andrea e Óscar xogamos o xogo da Ronda do Lobo e
finalizamos con varias cancións populares que nos aprenderon os nosos amigos e rematamos coa canción de despedida.


O sabadiño do Roque
Próxima sesión: sábado 14 de decembro ás 12.00h
*Inscrición a partir do 15 de novembro

LEMBRAMOS QUE ESTA ACTIVIDADE TEN PREVIA INSCRICIÓN POR SEGURIDADE PARA O PÚBLICO E A BOA REALIZACIÓN DA PROPIA ACTIVIDADE.

Os interesados en participar neste obradoiro poden formalizar a súa inscrición para cada unha das sesións a partir das 10.30 h do 15 de cada mes de forma presencial na biblioteca, mandando un correo electrónico a bpneiravilas@vigo.org indicando os seus datos (nome e apelidos, idade, enderezo, teléfono e correo electrónico) ou ben a través do teléfono 986 267 759. O obradoiro é gratuíto e as prazas cóbrense por orde de inscrición.

martes, 29 de octubre de 2013

Entre Arrolos e Contiños: outubro 2013

O sábado día 26 de outubro visitounos de novo Bea e David cunha nova sesión de Arrrolos e Contiños. 
Nesta actividade foméntanse diferentes aspectos fundamentais do desenvovemento dos bebés: creatividade, relacións entre iguais, coñecemento do propio corpo verbal e artística, a imaxinación, a participación e a cooperación. Un dos obxectivos fundamentais é  espertar a curiosidade e o interese polo mundo dos libros e crear hábitos de lectura entre as familias.
Nesta sesión, Bea e David contaron "O pito da abeleira", "A granxa" e "Lúa". Tamén ensinaron a "tirar da cisterna" e coma sempre remataron coas cancións de Arrolos e Carmiña Carmela.

Contos Dakí: Outubro 2013 con Celso Sanmartín

Dentro da nosa actividade de contacontos para adultos "Contos Dakí" o vernes día 25 de outubro, estivo connosco Celso Sanmartín. Comezamos unha nova tempada!!!. Iniciou a sesión cun repertorio composto por contos e historias da tradición oral galega. Contos de verdade ou contos de mentira?? Fíxonos crear a dúbida entre as persoas que estivemos na actividade. Deseguido tamén contou historias de reis e de curas e tamén por suposto, contos de mortos, sobre todo por que se aproxima a data do Samaín. Celso crea unha actividade chea de paixón, sentido e amor: pola lingua, pola oralidade, pola comunicación e sobre todo para non perder o verdadeiro tesouro que temos de historias e contos.

Club de lectura 2013-2014

O Club de Lectura xa está de novo reunido na biblioteca de outubro a xuño, o 1º e o 3º xoves do mes.Comezamos unha nova tempada e xa podemos volver a compartir ideas, pensamentos e reflexións.Este ano volve a nosa coordinadora do club, Marila Ruiz, autora de "Dentro da illa". Comentaránse obras de distintos xéneros literarios dentro dun ambiente de familiaridade, procurando compaxinar o lado formativo co lúdico.

Encontro con escritores... Fran Bueno e David Rubín

O vernes día 11 de outubro ás 19:30 visitáronnos na biblioteca dous dos creadores galegos de banda máis destacados do panorama profesional de banda deseñada, Fran Bueno e David Rubín. Os dous creadores foron premiados con Premio Castelao de Banda Deseñada neste ano 2013. A actividade foi moi participativa xa que na charla fixeron un repaso das características dos superheroes, dos cambios que sufriron ao longo do tempo, e tamén como se fan os guións. Ao remate da actividade adicáronnos os seus libros, agasallándonos cunha mostra da súa arte.

viernes, 11 de octubre de 2013

A hora dos contos: Outubro 2013

Trini  Puentes visitounos este xoves cargadiña de sorpresas moi especiais para todos nós.


A sesión de contos xirou en torno a un sombreiro, pero non a un sombreiro calquera se non ao sombreiro creado por Manuel Rivas “O Sombreiro Chichiriteiro”. Trini contounos este fermosos conto de Rivas no que un neno chamado Simón recolle un sombreiro dun xigantón que viaxaba montado nunha avestruz e o que acontécenlle mil aventuras.

Máis tarde Simón contounos o conto do Mago Goma; un conto en verso que narra a historia deste peculiar mago que so quere facer feliz aos nenos. Logo unha cabra que paseaba por alí cantounos unha fermosa canción onde daba paso a outro moitos animais.
O sombreiro e Simón seguiron viaxando e cantáronnos a canción “Un vello”. Regresaron a festa do avó onde converteuse nun narrador de historias e contou moitos contos a rapazada da biblioteca, como o conto dos ladróns enganados polos animais.

O rematar os conto o público fixo uns preciosos sombreiros chiciriteiros que levaron para a casa.

                                                                                                                                  
 A hora dos contos
Próxima sesión: xoves, 14 de novembro ás 18.00h

Mostra de Superheroes


Este mes adicamos a nosa mostra aos Superheroes, tan necesarios nas nosas vidas.

Con esta mostra bibliográfica e audiovisual a biblioteca quere homenaxear os grandes heroes da banda deseñada: a Superman, Linterna Verde, Batman, Hulk Os Catro Fantásticos, X-Men, tamén a outros superheroes con no tan boa prensa coma Hellboy , Wahchmen ou o noso Superlópez.

Estes personaxe herdeiros dos heroes clásicos, cunha mistura de poderes extraordinarios e situacións de conflito, xa sexan persoais ou familiares, convertéronse nun gran produto nos anos 30 nos cómics estadounidenses. Pero ata a actualidade estes heroes sufriron diferentes cambios que responden tamén a un cambio na sociedade. Todos estes cambio podémolos ver nesta mostra que estarádispoñible na biblioteca ata o día 2 de novembro para conxulta en sala ou para levar en préstamo.

Para complementar esta actividade terán lugar o día 11 de outubro unha Mesa de Superheroes. Nela acompañaranos David Rubín e Fran Bueno, dous autores e debuxantes de banda deseñada que achegarannos o feito de creación destes personaxes.


Superheroes
Do 7 de outubroao 2 de novembro de 2013
Horario de apertura da biblioteca

Sabadiño do Roque: Outubro 2013

Este sábado 5 de setembro tivemos a sorte de que acompañounos o noso amigo Roque xunto a Andrea e Óscar nunha xornada onde gozamos escoitando contos e xogando.

Como es habitual os nosos amigos Andrea E Óscar déronnos a "Benvida" coa súa fermosa canción onde cada un de nos fomos presentándonos. Este sábado había moitas caras novas, así que aprendemos novos nomes e coñecemos a moita xente.

Andrea contounos varios contos, pero o que máis nos gustou foi o de Miau, onde escoitamos a moitos animais diferentes.

Logo visitounos o noso amigo Roque, que aínda non se desprendeu da súa chupeta! E mira que a rapazada da biblioteca insiste para que a deixe porque xa e moi maior para seguir con ela. Roque estaba moi desgustado por que un neno do cole colleulle sen permiso unha das súas pinturas e Roque, queríalle pega ao neno. Xa lle contamos todos que non se pode pegar, e que tiña que solucionalo pola vía diplomática, é dicir, tiña que falar co seu compañeiro e pedirlle que lle devolvese a cor. Que non pasa nada que pode collelas, porque Roque se as deixa pero que ten que avisar.

Pero aparte deste incidente Roque está feliz de ir o cole, porque alí pinta, xoga, fai ximnasia e atopouse coas súas vellas amizades e fixo tamén novas.

Nesta ocasión Roque tamén tivo carta do seu avó Agustín onde propoñía varias adiviñas... e como a rapazada da biblioteca e moi lista as adiviñou todas. E a xente do público animouse e saíron a contar as súas adiviñas e ata algún animouse con unha poesía.

Máis tarde debuxamos todos seguindo uns puntos definidos e onde aparecían diferentes animais como un coello ou un canguro.


Para rematar cantamos a canción dos parabéns á xente que estivo este mes de aniversario e o Roque despediuse ata a próximo mes.

O sabadiño do Roque
Próxima sesión: sábado 2 de novembro ás 12.00h
*Inscrición a partir do 15 de outubro

LEMBRAMOS QUE ESTA ACTIVIDADE TEN PREVIA INSCRICIÓN POR SEGURIDADE PARA O PÚBLICO E A BOA REALIZACIÓN DA PROPIA ACTIVIDADE.

Os interesados en participar neste obradoiro poden formalizar a súa inscrición para cada unha das sesións a partir das 10.30 h do 15 de cada mes de forma presencial na biblioteca, mandando un correo electrónico a bpneiravilas@vigo.org indicando os seus datos (nome e apelidos, idade, enderezo, teléfono e correo electrónico) ou ben a través do teléfono 986 267 759. O obradoiro é gratuíto e as prazas cóbrense por orde de inscrición.


viernes, 27 de septiembre de 2013

Entre arrolos e contiños. Setembro 2013

Comeza o curso e na biblioteca comezan de novo as nosas actividades permanentes. Nesta ocasión regresaron a biblioteca Bea Campos e David González para contarnos un montón de contos e cantarnos moitas cancións cos seus arrolos.



A sesión comezou coma sempre coa fantástica canción de Benvida de Entre Arrolos e Contiños, que xa todos coñecemos e que cantamos xuntos,

Logo contaronnos os fermosos conto das "Botas Novas" o de "Osiño", "Pe de boca grande" e o noso favorito "Iyoke é moi pequeno". A historia dun pequerrecho que admira a todos os animais da selva polo grande, fortes e veloces que son pero descubre que ser pequerrecho tamén ten o seu lado positivo, porque así pode acurrucarse no colo da súa nai.

Para animarnos a mañá deste sábado e deixarnos coa alegría cargada para todo o fin de semana os nosos amigos sorprendéronnos coa "Samba Lelé" e co tradicional "Ondiñas veñen" que todos cantamos moi alegres e que non deixamos de cantar durante días.

Para rematar a sesión cantaron a canción de despedida de Arrolos e citáronnos para a próxima sesión.


 Entre arrolos e contiños
Próxima sesión: sábado, 26 de outubro ás 12.00h

TRADUTTORE, TRADITORE: Contacontos


O pasado sábado 14 de setembro, o noso amigo Luís Pérez de Lis ofreceunos unha sesión de contacontos en inglés.

Con esta iniciativa xunto coa mostra que bibliográfica que temos na biblioteca ata o 5 de outubro queremos celebrar o Día da Tradución que ten lugar o 30 de setembro. Unha profesión fundamental neste mundo globalizado e esencial para a comunicación entre culturas. Tamén quixemos destacar a necesidade de aprender idiomas como unha fonte de coñecemento, para descubrir outros mundos, nova xente e novas culturas.



Nesta sesión de contacontos Luís fixo un roteiro polos contos tradicionais. Así contou a Bella durminte, Os tres porquiños e a Ratiña presumida. E o finalizar puidemos ver unha versión animada dos tres porquiños.

A pesar da barreira idiomática Luis foi capaz de introducirnos dentro de cada historia e que pouco a pouco o público coñecera unha nova versión dos contos tradicionais.

De novo agradecemos a Luis Pérez de Lis esta iniciativa na que gozamos moito e aprendemos un montón de novas palabras e expresións en inglés.