viernes, 30 de diciembre de 2011

A cesta dos libros

Remata o 2011, e con el o primeiro ano de vida da Biblioteca Xosé Neira Vilas. 

Queremos agradecervos a todos os usuarios os bos ratos compartidos, os comentarios, a vosa participación, os vosos sorrisos... 


É por iso que quixemos premiar aos lectores máis activos de cada categoría (adulto e infantil) cun lote de libros cos que comezar o 2012 gozando coas mellores lecturas. Agardamos que vos gusten!

Estes son os mellores lectores de 2011 na categoría de Adulto:
  • Miguel Bande
  • Marcos Braian Fernández
  • José María Freijo
  • Pilar Miranda
  • Javier Bueno
  • Eva Elorrieta
E agora os mellores lectores na categoría Infantil:
  • Laura Piñeiro
  • Génesis e Chanell Conde
  • Uxía e Breixo Merino
  • Samuel Signo
  • Sabela e Brais Miñana
  • Santiago Fernández
  • Xela e Breixo Lores

De novo, moitas grazas a todos por estes fantásticos 9 meses, sen vós a biblioteca non sería o que é.

Feliz Aninovo a todos. Vémonos no 2012!




lunes, 19 de diciembre de 2011

Programación de Nadal


 CONVIDÁMOSVOS A CELEBRAR O NADAL NA BIBLIOTECA! 

O Nadal son datas moi especiais para todos, por iso na Biblioteca Xosé Neira Vilas queremos celebralas con todos vós organizando unha serie de actividades para toda a familia que nas que vos convidamos a participar.


Do 14 de decembro de 2011 ao 3 de xaneiro de 2012
Buzón Real

Dende o día 14, teremos a disposición de todos os nenos e nenas un Buzón Real, no que poder deixar as cartas escritas aos Reis Magos, que virá a buscar un Paxe Real o día 3 de xaneiro!


Martes 20 de decembro de 2011 ás 18.00 h
Os contos de Pablísimo

Comezamos as nosas actividades de Nadal cunha xornada especial de contacontos da man do xenial Pablísimo, que visita de novo a Biblioteca Xosé Neira Vilas para presentarnos os seus "Contos con ovos", unha sesión moi moi redondiña onde os protagonistas son os ovos... e o que sae deles!

Destinatarios: Actividade para nenos entre 3 e 10 anos
Aforamento: Entrada libre ata completar aforamento


Mércores 21 de decembro de 2011 ás 18.00 h
Obradoiro de Nadal

Realizaremos postais de Nadal con diferentes materiais e escribiremos as nosas cartas aos Reis Magos.

Destinatarios: Actividade para nenos entre 3 e 10 anos
Aforamento: Entrada libre ata completar aforamento


Do 27 de decembro de 2011 ao 3 de xaneiro de 2012
Un mundo de títeres. Mostra de monicreques

Viravolta títeres ofrécenos esta mostra dos materiais empregados nos seus espectáculos: teatriños, vestiarios, decorados, atrezzo e marionetas. Tamén monicreques e libros de distintas partes do mundo que amosan as variedades técnicas tanto de construción como de manipulación. Unha mostra na que os visitantes poderán fomentar a súa atracción polo mundo dos títeres e coñecer o interior dun teatriño.

En horario de apertura da biblioteca


Martes 27 de decembro de 2011 ás 18.00 h
O Galo Quirico (monicreques)

Na inauguración da mostra de monicreques, represéntase o conto O Galo Quirico, seguindo a versión de Bernardino Graña, xunto con algúns números de marionetas tradicionais no que os espectadores participarán activamente cantando e danzando.
Unha atractiva posta en escena con marionetas e teatriño de cartón con música en directo!

Destinatarios: Actividade para nenos entre 3 e 10 anos
Aforamento: Entrada libre ata completar aforamento


Mércores 28 de decembro de 2011 ás 18.00 h
O Quiquiriquí

Preséntase na biblioteca o libro-disco O Quiquiriquí. Cantos para o Nadal", unha actividade para toda a familia na que se proxectará un pequeno documental e se realizarán unha serie de actividades de dinamización como xogos, cantigas, etc.

Destinatarios: Actividade para nenos entre 3 e 10 anos
Aforamento: Entrada libre ata completar aforamento


Venres 30 de decembro de 2011 ás 20.00 h
Cesta de libros

Para celebrar que remata o 2011, o primeiro ano de vida da Biblioteca Xosé Neira Vilas, premiaremos aos lectores máis activos de cada categoría (adulto e infantil) cun lote de libros para que poidan comezar o 2012 gozando das mellores lecturas.

Destinatarios: Todos os usuarios da biblioteca

Martes 3 de xaneiro de 2012 ás 18.00 h
Obradoiro de títeres

Para pechar a mostra de monicreques, celebraremos un obradoiro no que construiremos un títere ou un cabezudo sinxelo, empregando as ferramentas básicas de construción, obtendo un resultado que ao final será moi gratificante para os participantes.

Destinatarios: Actividade para nenos entre 3 e 10 anos
Aforamento: 30 prazas (Previa inscrición)*

*Inscrición para o obradoiro:
Os interesados en participar neste obradoiro poden formalizar a súa inscrición do 23/12/2011 ata o 3/01/2011 na biblioteca ou no teléfono 986 267 759. O obradoiro é gratuíto e consta de 30 prazas (preferencia por orde de inscrición).

Martes 3 de xaneiro de 2012 ás 19.00 h
Visita do Paxe Real

O Paxe Real e o axudante dos Reis Magos veñen á biblioteca para recoller as peticións de agasallos dos nenos e levarllas ás súas maxestades.
Destinatarios: Actividade para toda a familia


DENDE A BIBLIOTECA XOSÉ NEIRA VILAS DESEXÁMOSVOS FELICES FESTAS

A hora dos contos. O Nadal

Neste mes de decembro, a nosa cita coa Hora dos Contos, que cada terceiro sábado nos ofrece a xenial Trini, non podía falar doutro tema que non fose o Nadal...

Así, escoitamos a historia dunha árbore de Nadal que ninguén quere e que da man duns nenos moi mañosos se transforma na árbore máis bonita de todas. Tamén coñecemos a Antón o Apalpador, que vai polas aldeas do Caurel apalpando a barriga dos nenos na noite do 24 de decembro. Tampouco faltaron no repertorio os Reis Magos, nin clásicos destas datas, como o Conto de Nadal de Charles Dickens.

Despois de escoitar os contos de Trini, chegou o turno de que os membros do noso club puidesen ler tamén as historias que van escribindo no seu caderno, todas elas fantásticas!!

Para rematar a mañá, o noso amigo Santiago dounos unha agradable sorpresa acompañándonos coa súa guitarra para interpretar a canción da Hora dos contos, que cantamos e bailamos entre todos.

Como sempre, na despedida Trini repartiu o material co que completar o noso caderno de lecturas, e tras apalpar a barriga dos nenos/as, foi repartindo castañas entre os participantes.

Podedes consultar todas as imaxes da mañá na sección "As nosas fotos"


A hora dos contos
De outubro a xuño, o terceiro sábado de mes ás 12.00 horas.

lunes, 12 de diciembre de 2011

Estoxos Viaxeiros. Alxeria

O sábado pasado, como moitas outras persoas que aproveitaron a ponte para viaxar, na biblioteca trasladámonos ata a lonxana Alxeria da man dos nosos Estoxos Viaxeiros.

Como sempre, puidemos asomarnos á súa historia e á súa cultura, a través do contido do noso estoxo: a música andaluza, a literatura, o alfabeto... e como sempre, a gastronomía, que non falta en ningunha das nosas citas!

Todas as imaxes da xornada en "As nosas fotos"



Estoxos viaxeiros
De outubro a decembro, o segundo sábado de cada mes ás 12.00 horas
Próximo destino: Perú

miércoles, 7 de diciembre de 2011

O Sabadiño do Roque. Contos de Nadal

O pasado sábado tivemos ocasión de gozar dunha nova sesión do Sabadiño do Roque no que, como non podía ser doutra forma nestas datas, falamos das festas do Nadal.
Así, coñecimos primeiro a historia da Xirafa Chufa e o seu baile de Nadal, pero tamén a da Ratiña Lola ou a de Martiño, cando a noite de Reis lle entraron unhas irresistibles ganas de facer pis... Por último, tivemos tamén a oportunidade de escoitar os berros de dor dun rei moi especial o día que se lle cravou un alfinete nas súas reais pousadeiras!!
Tras escoitar estes fabulosos contos, que arrincaron sorrisos a grandes e pequenos, chegou o momento que os máis cativos esperaban: Roque volveu a presentarse na biblioteca, esta vez cun grande problema: escribir a súa carta aos Reis Magos! Entre todos axudámolo a confeccionala, recordando sempre que non debemos ser demasiado pedichóns...
E para rematar tan estupenda mañá, fixemos un ensaio da noite de fin de ano, probando a escoitar as 12 badaladas, e con cada unha, un gusanito para a barriga... Tampouco podía faltar o "champín" para brindar e desexarnos unha feliz entrada no 2012!!


Todas as fotos desta animada xornada na sección "As nosas fotos".


O sabadiño do Roque
De outubro a xuño, o primeiro sábado de cada mes ás 12.00 horas

martes, 29 de noviembre de 2011

Toponimia do Val do Fragoso. Coloquio

Tras a presentación no mes de maio do libro Toponimia do Val do Fragoso: Lavadores na BPM Xosé Neira Vilas, o vindeiro 2 de decembro, a Concellería de Normalización Lingüística organiza tamén na biblioteca un encontro co autor da obra, Iván Sestay, que fai un exhaustivo estudo dos topónimos do barrio de Lavadores, afondando na súa orixe e nos seus significados.

No coloquio, o autor compartirá con todas aquelas persoas interesadas as súas investigacións ao redor desta histórica parroquia.


Venres 2 de decembro ás 19.30 horas

viernes, 25 de noviembre de 2011

Achégate a internet II

O mércores rematou a II edición de Achégate a internet, un curso de alfabetización dixital dirixido a aqueles usuarios da biblioteca que querían iniciarse no mundo das novas tecnoloxías.

Día tras día, e grazas ás explicacións de Alicia (a profe), os participantes foron desenvolvéndose cada vez con máis soltura, aprendendo a manexar as ferramentas básicas para poder buscar, utilizar e valorar a información que internet nos ofrece, especialmente nos ámbitos máis cotiás: uso de buscadores, correo electrónico, almacenaxe da información, etc.
 
Soamente nos queda darlles as grazas a todos os participantes, agardando que a partir de agora as novas tecnoloxías non teñan segredos para eles!

lunes, 21 de noviembre de 2011

A hora dos contos

O sábado 19 de novembro tivemos ocasión de volver a disfrutar de Trini Puentes e a súa Hora dos contos. 

Esta vez achegámonos a seres fantásticos como as fadas e os trasnos, protagonistas de contos tan fermosos como o clásico dos irmás Grimm O zapateiro e os trasnos.

Tampouco faltaron as cancións e outras moitas historias que animaron esta estupenda mañá de sábado.

Para rematar, como cada semana, completamos unha folla máis do noso Caderno de lecturas, que mes a mes imos enchendo con aqueles con contos, debuxos, cancións, etc.

A hora dos contos
De outubro a xuño, o terceiro sábado de mes ás 12.00 horas.

jueves, 17 de noviembre de 2011

Estoxos Viaxeiros. Armenia

O pasado sábado tivemos na biblioteca a nosa segunda cita cos Estoxos Viaxeiros, que nesta ocasión leváronnos ata Armenia para achegarnos un anaquiño da súa cultura, a súa xeografía, a súa historia...


Comezamos a viaxe acompañados polo son do Duduk, un instrumento  de vento tradicional feito con madeira de albaricoque, árbore típica do país, protagonista tamén da fermosa historia do Ladrón de albaricoques, que tivemos a ocasión de escoitar da man de Vahe e Margarit. 

Soubemos tamén que segundo a tradición a arca de Noé pousouse no monte Ararat, un dos principais símbolos de identificación de Armenia e que aparece no seu escudo. Aprendimos así mesmo o alfabeto armenio, a xogar ao Kraketik...

Unha xornada fantástica que non podía rematar sen achegarnos á gastronomía do país, así que despedímonos degustando un riquísimo hoxaldre de queixo!

No estoxo Destino Armenia podedes atopar:

El Sol, de M. Mikayelyan
System of a Down (CD)
Sound of our life, de Amenian Navy Band (CD)
De la felicidad, de Ara Malikian (CD)
Receitas de cociña (6)
Revista (1)
Fichas didácticas sobre Armenia
Glosario
Mapa (1)
A Arca de Noé, caixa de xogos (un bote de tinta e 10 animais)
Kraketik: bolsiña con pedras (xogo)
Insignia coa bandeira de Armenia
Billetes armenios (8)
Monedeiro: 5 moedas e 2 fichas de metro
Xadrez
Sobre con quebracabezas
Imán con forma de granada
Trigo
Caderno de notas

Estoxos viaxeiros
De outubro a decembro, o segundo sábado de cada mes ás 12.00 horas
Próximo destino: Alxeria

miércoles, 16 de noviembre de 2011

Mostra Bibliográfica. Álvaro Cunqueiro

Co gallo da conmemoración do centenario do nacemento de Álvaro Cunqueiro, a Biblioteca Xosé Neira Vilas ofrece unha escolma da bibliografía do dito autor (biografías, antoloxías, ensaios...) que poderán consultar todos os usuarios do centro e que favorecerá o achegamento á súa vida e á súa obra.

Desta maneira queremos unirnos ás distintas homenaxes que ao longo do ano se teñen celebrado en diferentes lugares da xeografía galega, e ao mesmo tempo contribuír á difusión da figura de Álvaro Cunqueiro, unha das voces máis destacadas da narrativa galega do século XX, máximo expoñente do realismo máxico, e que fixo tamén importantes aportacións noutros xéneros literarios como o teatro, a lírica ou o ensaio.

As obras seleccionadas estarán a disposición dos usuarios da biblioteca en consulta en sala.
 
Datas: do 17 de novembro ao 31 de decembro en horario de apertura da biblioteca.

jueves, 10 de noviembre de 2011

Estoxos Viaxeiros. Armenia

Este sábado 12 de novembro ás 12.00 horas a Biblioteca Xosé Neira Vilas acolle o segundo dos nosos Estoxos viaxeiros, unha actividade para toda a familia na que viaxaremos polo mundo coñecendo novos países e diferentes culturas. O noso destino en novembro: Armenia. 
Agardámosvos!

martes, 8 de noviembre de 2011

O Sabadiño do Roque. A cociñar!

O pasado sábado 5 de novembro celebramos na Biblioteca Xosé Neira Vilas a segunda sesión do Sabadiño do Roque, que todos os meses estará con nós para deleitarnos cos seus contos, cantigas e xogos.

Nesta ocasión, o tema que propuxo a todos os participantes foi a cociña. Así, despois de escoitar dúas historias que teñen que ver coa comida e os sabores, como son A que sabe a lúa? e O rato Renato, todos os participantes na actividade puxéronse mans á obra e convertéronse en grandes reposteiros: entre todos realizamos tres sabrosísimas tartas de galleta e chocolate para chupar os dedos!

Non faltaron tampouco as cancións, os xogos, ou a lectura do conto que estamos a escribir entre todos os participantes no Sabadiño do Roque.

Como sempre, as imaxes da xornada na sección "As nosas fotos"



O sabadiño do Roque
De outubro a xuño, o primeiro sábado de cada mes ás 12.00 horas

lunes, 7 de noviembre de 2011

A noite das cabazas


O pasado luns 31 de novembro na Biblioteca Xosé Neira Vilas festexamos a Noite das cabazas cunha historia protagonizada polo rato Renato, que na súa procura dunha cabaza para facer a súa casa, vaise mergullar na noite do Samaín descubrindo as tradicións das festas do Magosto.

Despois de escoitar as andanzas de Renato, todos os nenos e nenas asistentes puideron participar nun fantástico e terrorífico taller de maquillaxe, converténdose nos máis temibles personaxes: vampiros, monstros, bruxas e un longo etcétera desfilaron pola biblioteca para festexar esta noite tan especial!

jueves, 3 de noviembre de 2011

O Sabadiño do Roque. A cociñar!

O vindeiro sábado 5 de novembro temos unha nova cita ás 12.00h co Sabadiño do Roque.

Este mes trataremos o tema da cociña, así que vide ben preparados para escoitar fantásticas historias coas que relamernos, e por suposto, para poñer o mandil e converternos en grandes chefs!

miércoles, 2 de noviembre de 2011

Achégate a Internet. II Edición


Comeza a II Edición do curso Achégate a Internet, destinado a todos aquelas persoas maiores de 16 anos que, sen ter experiencia no manexo de ordenadores, queiran iniciarse no uso das novas tecnoloxías da información. 

jueves, 27 de octubre de 2011

A Noite das Cabazas

O vindeiro luns 31 de outubro a Biblioteca Xosé Neira Vilas celebra a Noite das Cabazas


miércoles, 26 de octubre de 2011

Club de lectura

O vindeiro xoves 3 de novembro comeza na Biblioteca Xosé Neira Vilas o Club de lectura.
O club de lectura é un grupo de persoas afeccionadas á lectura que se reunirá o 1º e o 3º xoves de cada mes para comentar e valorar un libro proporcionado pola propia biblioteca coa axuda da coordinadora do club, Marila Ruiz.

Non é preciso ser un experto lector para participar, o club está concibido para todas aqueles persoas con inquedanzas culturais, ganas de ler e de intercambiar ideas e opinións con outros lectores. 

Comentaranse obras de distintos xéneros literarios, nun ambiente confortable e distendido co que animar aos participantes a gozar da literatura e a compartir cos demais membros do club as súas reflexións, de modo que sexa un foro de intercambio de ideas que sexa enriquecedor para todos. 

Esta primeira sesión será a de presentación do club e dos seus membros, na que se darán a coñecer as normas e o funcionamento do mesmo e na que se proporá a primeira lectura a realizar.


lunes, 24 de octubre de 2011

Día da Biblioteca. Os contos de Pablísimo

O 24 de outubro celébrase en todo o mundo o Día da Biblioteca, e como non podía ser doutra forma, na BPM Xosé Neira Vilas unímonos a este festexo cunha sesión dos Contos de Pablísimo! Non tedes máis que coller un pouquiño de contacontos, engadirlle unha pinguiña de teatro, deixalo ao baño María con animación á lectura, botarlle un chisco de pantomima ....e xa tedes unha sesión de Pablísimo.

Nesta ocasión deleitounos con tres fantásticas historias: primeiro coñecemos ao puntiño Aquiles, que grazas ós seus esforzos chegou a conseguir todo o que desexaba, despois tivemos ocasión de acompañar a un intrépido ratiño que tivo valor para enfrontarse ao temible grúfalo e por último poidemos escoitar unha divertidísima versión do conto da princesa e o chícharo, na que os asistentes participaron de forma activa axudando a crear os efectos sonoros da historia: o galope dos cabalos, a tormenta e a chuvia, a porta do castelo, a princesa asoando os mocos...

Como sempre, todas as fotos desta fantástica xornada na sección “As nosas fotos”.

miércoles, 19 de octubre de 2011

lunes, 17 de octubre de 2011

A hora dos contos

O pasado sábado organizamos na Biblioteca a nosa primeira Hora dos Contos, o club de lectura para os máis pequenos da casa que se celebrará cada terceiro sábado de mes.

Da man de Trini Puentes escoitamos fantásticas historias, dende as aventuras de Afonso na súa busca do libro perfecto, ás de Enrique, o incrible neno come libros. Nun momento de auténtica maxia, a Caixa das Palabras fíxose un oco para contarnos un divertidísimo conto a base de anacos de diferentes historias, as que cada un dos participantes lle foron dicindo ao oído...

A xornada rematou coa inauguración do mural "O meu conto favorito é...", no que os nenos e nenas puideron escribir o título do seu libro preferido, e que iremos completando ao longo do curso.

Finalmente repartimos os cadernos dos socios do club, no que cada mes iremos apuntando e mesmo debuxando aquelas historias que máis nos gusten. Estreamos este diario pegando na  primeira páxina a letra dunha canción que iremos cantando en cada unha das nosas xuntanzas.


A hora dos contos
De outubro a xuño, o terceiro sábado de mes ás 12.00 horas.

martes, 11 de octubre de 2011

Estoxos Viaxeiros. Colombia

O pasado sábado presentamos na biblioteca o noso primeiro Estoxo Viaxeiro, co que cada mes nos achegaremos a novos mundos, culturas e realidades diferentes.

Con este primeiro estoxo viaxamos ata Colombia da man dun dos nosos socios, Carlos Andrés, que de forma moi didáctica foinos  presentando a súa cultura, as súas festas, os seus costumes ou a súa gastronomía. Coñecimos así a realidade xeográfica do país, pero tamén aqueles aspectos que normalmente nos resultan máis descoñecidos, ligados á tradición. E para despedir a xornada, que mellor que facelo tomándonos unha da bebidas máis típicas de Colombia: a aguapanela.
 
Dende hoxe, o estoxo está a disposición de todas aquela familias que queirades gozar na casa cun anaquiño deste formidable país. Préstase durante unha semana e nel descubriredes unha selección de materiais relacionados con Colombia, xunto cun pequeno caderno no que poderedes anotar as vosas experiencias, de forma que entre todos vaiamos enriquecendo esta particular maleta.

No estoxo Destino Colombia podedes atopar:
  Un mapa mundi
  El diminuto Piti, de María Eliana Vélez
  Lonely Planet: Colombia (guía de viaxe)
  Grande éxitos de Shakira (CD)
  Un día normal de Juanes (CD)
  Billetes (6)
  Fichas didácticas sobre Colombia
  Quebracabezas de Colombia
  Saquiño de café
  Yeimi: chapas e pelota (xogo popular)
  Golosa (xogo popular)
  Poncho
  Caixiña de receitas (6)
  Libro para colorear: El renacuajo paseador
  Caderno de notas


Estoxos viaxeiros
De outubro a decembro, o segundo sábado de cada mes ás 12.00 horas
Próximo destino: Armenia

martes, 4 de octubre de 2011

Club de lectura

Ao longo deste mes de outubro todas aquelas persoas que gocen coa lectura poderán inscribirse no noso Club de lectura.

O club reunirase dúas veces ao mes (1º e 3º xoves de cada mes) para comentar e valorar un libro proporcionado pola propia biblioteca coa axuda dun coordinador. Non é preciso ser un experto lector para participar, o club está concibido para todas aqueles persoas con inquedanzas culturais, ganas de ler e de intercambiar ideas e opinións con outros lectores.
 

Comentaranse obras de distintos xéneros literarios, nun ambiente confortable e distendido co que animar aos participantes a gozar da literatura e a compartir cos demais membros do club as súas reflexións, de modo que sexa un foro de intercambio de ideas que sexa enriquecedor para todos.

Podedes descargar a ficha de inscrición no seguinte enlace: 

O Sabadiño do Roque

O pasado sábado 1 de outubro na Biblioteca Xosé Neira Vilas retomamos as actividades permanentes para os máis pequenos, e que mellor forma de facelo que presentando por primeira vez ao Roque, un simpático personaxe que como nós vive no Calvario, que adora a biblioteca e que o primeiro sábado de cada mes estará con nós para deleitarnos cos seus contos, cantigas e xogos. Acompáñano os seus amigos, Andrea e Óscar, e xuntos serán os encargados de facer que os Sabadiños do Roque sexan unha cita ineludible para nenos e nenas: aprenderemos cancións, escoitaremos fantásticas historias e faremos un sinfín de actividades que Roque nos irá propoñendo. Mes a mes elaboraremos tamén o noso propio conto colectivo, no que todos os participantes nesta fabulosa actividade poderán poñer o seu gran de area.

As fotos da primeira sesión están xa á vosa disposición no apartado "As nosas fotos".

O sabadiño do Roque
De outubro a xuño, o primeiro sábado de cada mes ás 12.00 horas

Pintando a Biblioteca


Entre o 19 e o 30 de setembro, o ilustrador Federico Fernández realizou un mural deseñado ex profeso para a Biblioteca Xosé Neira Vilas: trátase dunha máquina que recolle os libros, catalógaos e logo ordénaos no seu andel correspondente... o desexo de todo bibliotecario!



Durante a realización do mural a biblioteca mantivo os seus servizos habituais, polo que os usuarios puideron presenciar a evolución do traballo e observar ao artista ao longo do proceso creativo.

Federico Fernández é licenciado en Belas Artes, na especialidade de pintura, pola Universidade de Vigo, e ao longo da súa carreira ten participado en numerosas exposicións de pintura e gravado, tanto individuais como colectivas. En 2002 recibiu o Premio ás Mellores Ilustracións de Libros Infantís e Xuvenís por Onde perdeu Lúa a risa?. Actualmente é profesor na Escola de Artes e Oficios de Vigo e traballa como ilustrador para as editoriais Kalandraka e Xerais.

Segundo el mesmo explica “son un ilustrador que provén do mundo da pintura, ou un pintor que se colou entre os ilustradores, en calquera dos dous casos a miña relación cos pinceis é bastante estreita, e a miña paixón por eles logrou que con tempo me den de comer. Pero antes de que iso chegase a ocorrer, desempeñei traballos do máis diverso e para nada relacionados cos pinceis: pizzeiro, mensaxeiro, oficinista... pero sempre coa idea de poder vivir facendo o que máis me gusta (e coido que o único que sei facer porque en todos os demais traballos era malísimo): pintar. Por iso poño todo o meu empeño en conseguir que isto sexa algo máis que un traballo. Espero que vos guste".


Podedes ver todo o proceso creativo do mural na sección "As nosas fotos".

sábado, 1 de octubre de 2011

Autor do mes: Domingo Villar

Domingo Villar, nado en Vigo, vive en Madrid onde traballou coma guionista de televisión e de cinema. Dende hai anos é crítico gastronómico nunha emisora da radio nacional e colaborador habitual en diversas publicacións escritas. 
 
No 2006 publica a súa primeira novela Ollos de auga, unha apaixonante historia policial desenvólvese na cidade olívica e arredores. Protagonizada polo lacónico inspector Leo Caldas e polo seu axudante, Rafael Estévez, un aragonés destinado na cidade. Con este primeiro traballo obtivo o Premio Frei Martín Sarmiento (concedido por alumnos e alumnas lectores de toda Galicia) e, coa súa tradución para o castelán (Editorial Siruela), os premios Sintagma e Brigada 21. Tamén foi finalista en dúas categorías dos Crime Thriller Awards en Gran Bretaña. Publicada en doce países, a primeira novela protagonizada polo inspector Leo Caldas é un dos libros máis vendidos entre os lectores galegos.

 A praia dos afogados é a obra que consolidou a Domingo Villar coma un dos grandes escritores actuais deste xénero negro. O noso autor do mes volve introducir ó lector nunha intriga sen acougo nesta obra. Unha pescuda policial que salferida de humor e con grandes doses de suspense mergulla ó lector no mundo da Galicia mariñeira, dende os areais das Rías Baixas á paisaxe urbana e as tabernas da cidade. Esta obra foi galardoada cos Premio Frei Martín Sarmiento 2011 na categoría de adultos, Libro do Ano nos Premios Irmandade do Libro 2009, Premio Losada Diéguez de Creación Literaria e o Premio Brigada 21 de novela negra, e foi finalista do International Dagger Prize 2011.

Títulos que se poden atopar na biblioteca:

- Ollos de auga, Vigo: Galaxia, 2010.
- A praia dos afogados,Vigo: Galaxia, 2010.

Estes títulos están traducidos a seis idiomas, castelán e inglés entre eles.

miércoles, 28 de septiembre de 2011

Programación trimestral da Biblioteca Xosé Neira Vilas


O alcalde de Vigo, Abel Caballero, e a concelleira de Cultura e Festas, Isaura Abelairas, presentaron hoxe na Biblioteca Pública Municipal Xosé Neira Vilas a programación trimestral de actividades  dirixidas aos nosos usuarios.

Así, a partir deste sábado 1 de outrubro arrincan as nosas actividades permanentes, coas que queremos achegar a biblioteca, os seus recursos e os seus servizos a todos aqueles que queiran gozar con nós da lectura.


O sabadiño do Roque. Actividade para nenos/as 
Os nosos Sabadiños voltan á biblioteca da man dun amigo moi especial, o Roque. De outubro a xuño poderedes gozar cos seus contos, cantigas, xogos e moitas máis aventuras. Convidámosvos a que o veñades coñecer!
Cando? O primeiro sábado de cada mes, de outubro a xuño.

Estoxos viaxeiros. Actividade para as familias
Con esta actividade viaxaremos polo mundo coñecendo novos países e diferentes culturas cos "Estoxos viaxeiros", unha actividade para toda a familia.
Cando? O segundo sábado de cada mes, de outubro a decembro.

A hora dos contos. Contacontos cun Diario de Lecturas
Abren tamén as portas do Club da biblioteca para os máis pequenos coa "Hora dos contos", que poderemos seguir cos nosos propios diarios de lectura. 
Cando? O terceiro sábado de cada mes, de outubro a xuño.

Todas estas actividades e moitas máis están á vosa disposición  no seguinte enlace: 

sábado, 17 de septiembre de 2011

Na volta do verán. Ciclobiblioteca

Continuando coas actividades desta volta do verán, hoxe ás 12.00 o bardo Abelardo percorreu o paseo do Calvario coa súa ciclobiblioteca, convidando a todos os transeúntes a reunirse ao redor do seu carro para escoitar fermosas historias animadas sempre pola música do seu acordeón. 

Despois, os máis pequenos poideron gozar da lectura dos libros que o bardo leva na súa ciclobiblioteca, e para rematar, despediu a xornada cunha divertida canción que corearon grandes e cativos, convidando a todos  os participantes a visitar a Biblioteca Xosé Neira Vilas. Dende aquí, non podemos máis que recomendarvos que sigades o seu consello!

viernes, 16 de septiembre de 2011

Na volta do verán. Contacontos

Para comezar con bo pé o novo curso escolar na Biblioteca Xosé Neira Vilas celebramos na tarde de hoxe unha sesión de contacontos na que o Bardo Abelardo deleitou a grandes e pequenos coas súas historias e as súas cantigas. Visitáronnos trasnos, fadas e todo tipo de seres fantásticos, e a través de relatos como o de Vicentiño e as árbores da paz este simpático xograr foi quen de concienciarnos do importante que é manter limpo o noso planteta.

E para continuar con esta festa de principio de curso, o bardo Abelardo percorrerá mañá o paseo do Calvario coa súa ciclobiblioteca, cautivándonos de novo coas súas historias e a máxica música do seu acordeón. A cita é ás 12.00h fronte ao mercado, non o perdades!

Todas as imaxes, como sempre, na sección "As nosas fotos"

viernes, 9 de septiembre de 2011

Apertura da Biblioteca Pública Municipal Xosé Neira Vilas



Hoxe a Biblioteca Xosé Neira Vilas abriu de novo as súas portas tras a instalación durante o mes de agosto do mobiliario definitivo da mesma. Convidámosvos a vir a gozar das novas instalacións e servizos, e lembrámosvos o noso horario de apertura:


Horario ordinario (do 16 de setembro ao 14 de xuño)
Luns: de 17.00 a 20.30h.
De martes a venres: de 11.00 a 14.00h e de 17.00 a 20.30h.
Sábados: de 11.00 a 14.00h.


Horario de verán (do 15 de xuño ao 15 de setembro)
Luns: de 18.00 a 20.30h.
De martes a venres: de 11.00 a 14.00h e de 18.00 a 20.30h.
Sábados: de 11.00 a 14.00h.